हिंद दी चादर – नांदेडमध्ये इतिहास घडवणारा अभूतपूर्व सोहळा. २४ व २५ जानेवारीला संत, संस्कृती आणि समरसतेचा महोत्सव

 भारताच्या आध्यात्मिक, सांस्कृतिक आणि ऐतिहासिक परंपरेत 'हिंद दी चादर' ही उपाधी अढळ स्थान राखून आहे. धर्म, मानवता आणि राष्ट्ररक्षणासाठी स्वतःचे सर्वस्व अर्पण करणारे शीख धर्माचे नववे गुरु, श्री गुरु तेग बहादूरजी महाराज यांना दिलेली ही गौरवपूर्ण उपाधी केवळ एका व्यक्तीपुरती मर्यादित नाही, ती संपूर्ण भारतीय संस्कृतीच्या सहिष्णुतेचे आणि धर्मनिरपेक्षतेचे प्रतीक आहे. अशा या 'हिंद दी चादर' या महान संकल्पनेला अभिवादन करणारा ऐतिहासिक सोहळा २४ व २५ जानेवारी रोजी नांदेड येथे भव्य स्वरूपात आयोजित करण्यात आला आहे.

गुरु तेग बहादूरजी महाराजांनी अन्याय, अत्याचार आणि धार्मिक दडपशाहीविरोधात उभे राहत काश्मिरी पंडितांच्या धर्मस्वातंत्र्यासाठी आपले बलिदान दिले. 'धर्म रक्षणासाठी प्राण अर्पण करणे हेच खरे जीवनकार्य' या विचाराने प्रेरित होऊन त्यांनी संपूर्ण देशाला मानवतेचा आणि धैर्याचा आदर्श दिला. म्हणूनच त्यांना 'हिंद दी चादर' म्हणजेच हिंदू धर्माचे रक्षण करणारे चिलखत अशी उपाधी बहाल करण्यात आली. हा गौरव आजही भारतीय समाजाला सत्य, साहस आणि समतेची दिशा दाखवतो.

नांदेड ही भूमी शीख इतिहासात अनन्यसाधारण महत्त्वाची मानली जाते. श्री हजूर साहिब गुरुद्वार्‍यामुळे नांदेड जागतिक स्तरावर ओळखले जाते. याच पवित्र भूमीवर 'हिंद दी चादर' या संकल्पनेवर आधारित ऐतिहासिक सोहळ्याचे आयोजन होणे, ही नांदेडकरांसाठी अभिमानाची बाब आहे. या दोन दिवसीय कार्यक्रमात धार्मिक, सांस्कृतिक आणि वैचारिक कार्यक्रमांची रेलचेल पाहायला मिळणार आहे.

सोहळ्यादरम्यान गुरु तेग बहादूरजी महाराजांच्या जीवनकार्यावर आधारित व्याख्याने, कीर्तन, शबद गायन, सांस्कृतिक सादरीकरणे तसेच विविध मान्यवरांचे मार्गदर्शन आयोजित करण्यात आले आहे.  सर्व धर्मीय समाजघटकांचा सहभाग या कार्यक्रमाला लाभणार असून, 'सर्व धर्म समभाव' या भारतीय तत्त्वज्ञानाची प्रचीती येणार आहे. युवकांसाठी विशेष प्रेरणादायी सत्रे ठेवण्यात आली असून, त्यातून त्यांना राष्ट्रभक्ती, त्याग आणि नैतिक मूल्यांचे महत्त्व समजावून सांगितले जाणार आहे.

हा सोहळा केवळ धार्मिक कार्यक्रम नसून, तो सामाजिक एकोपा आणि राष्ट्रीय एकात्मतेचा संदेश देणारा महोत्सव ठरणार आहे. आजच्या बदलत्या काळात धर्म, जात आणि भाषा यांच्या पलीकडे जाऊन मानवतेचा विचार करणे आवश्यक आहे. गुरु तेग बहादूरजी महाराजांचे जीवनकार्य हेच शिकवते की, अन्यायाविरोधात उभे राहणे आणि दुर्बलांच्या पाठीशी खंबीरपणे उभे राहणे, हेच खरे धर्मकार्य आहे.

२४ व २५ जानेवारी रोजी नांदेडमध्ये होणारा 'हिंद दी चादर' हा ऐतिहासिक सोहळा प्रत्येक नागरिकासाठी प्रेरणादायी ठरणार असून, तो भारतीय संस्कृतीच्या महान परंपरेचे दर्शन घडवणारा ठरेल. या सोहळ्याच्या निमित्ताने नांदेड पुन्हा एकदा राष्ट्रीय पातळीवर श्रद्धा, इतिहास आणि समरसतेचे केंद्रबिंदू ठरेल, यात शंका नाही.