पोहरादेवी (साप्ताहिक दिग्रस एक्सप्रेस न्यूज नेटवर्क)
यंदाचा १४ फेब्रुवारी हा दिवस केवळ 'व्हॅलेंटाईन डे' म्हणून नव्हे, तर बंजारा समाजासाठी एक ऐतिहासिक क्षण म्हणून साजरा केला जाणार आहे. महाराष्ट्राचे मुख्यमंत्री देवेंद्र फडणवीस हे प्रेमदिनाचे औचित्य साधून बंजारा समाजाची काशी समजल्या जाणाऱ्या श्रीक्षेत्र पोहरादेवी येथे येत आहेत. संत सेवालाल महाराज यांच्या चरणी नतमस्तक होऊन ते समाजाप्रती असलेले सरकारचे प्रेम आणि आदर व्यक्त करतील.
*सोहळ्याची भव्य तयारी*
संत सेवालाल महाराज यांची २८७ वी जयंती साजरी होत असून, या निमित्ताने पोहरादेवी येथे जय्यत तयारी करण्यात आली आहे. या कार्यक्रमाच्या नियोजनासाठी राज्याचे मृद व जलसंधारण मंत्री संजय राठोड यांनी पुढाकार घेतला आहे. नगरा भवन येथे पार पडलेल्या आढावा बैठकीत त्यांनी प्रशासनाला स्पष्ट निर्देश दिले की, पोहरादेवीत येणारा प्रत्येक भक्त हा आपल्या कुटुंबातील सदस्याप्रमाणे आहे, त्यामुळे त्यांची गैरसोय होणार नाही याची प्रशासनाने दक्षता घ्यावी. जिल्हाधिकारी योगेश कुंभेजकर आणि पोलीस अधीक्षक अनुज तारे यांच्या मार्गदर्शनाखाली संपूर्ण प्रशासन या सोहळ्यासाठी सज्ज झाले आहे.
*सांस्कृतिक मेजवानी आणि मंगलीचे गायन*
या महोत्सवाचे मुख्य आकर्षण असणार आहे कर्नाटकातील सुप्रसिद्ध गायिका मंगली यांची उपस्थिती. आपल्या पहाडी आणि सुरील्या आवाजाने मंगली बंजारा गीतांचे सादरीकरण करतील. १४ फेब्रुवारीला सकाळी १० वाजेपासून रात्री १० वाजेपर्यंत सांस्कृतिक कार्यक्रमांची रेलचेल असणार आहे. मंगली यांच्या स्वरांनी पोहरादेवी दुमदुमून जाईल.
*सेवा रत्न पुरस्काराने सन्मान*
दुपारी १ वाजता मुख्यमंत्री पोहरादेवीत दाखल होतील. जगदंबा देवी आणि संत सेवालाल महाराजांच्या समाधीचे दर्शन घेतल्यानंतर मुख्य कार्यक्रम पार पडेल. यावेळी समाजात उल्लेखनीय कार्य करणाऱ्या मान्यवरांचा मुख्यमंत्र्यांच्या हस्ते 'सेवा रत्न पुरस्कार' देऊन गौरव करण्यात येईल. एकंदरीत, हा दिवस बंजारा समाजासाठी आनंदाचा आणि अभिमानाचा ठरणार आहे.
No comments:
Post a Comment