शेतकरी–शास्त्रज्ञ सुसंवाद दिग्रस येथे उत्साहातरेशीम शेती व केळी लागवड – शेतकऱ्यांसाठी नव्या संधींचे दालन

दिग्रस : (साप्ताहिक दिग्रस एक्सप्रेस न्यूज नेटवर्क)

प्रधानमंत्री कृषी सिंचन योजना (PMKSY 2.0) अंतर्गत कृषी विभाग आत्मा वतीने दि. ४ सप्टेंबर रोजी आयोजित केलेल्या शेतकरी–शास्त्रज्ञ सुसंवाद कार्यक्रमाला शेतकऱ्यांचा उत्स्फूर्त प्रतिसाद लाभला. फळपिक केळी व रेशीम उत्पादन तसेच तुती लागवडीबाबत मार्गदर्शन करीत या संमेलनात नव्या संधींचा वेध घेण्यात आला.

 रेशीम शेती – कमी गुंतवणुकीत जास्त नफा

या कार्यक्रमाला मार्गदर्शक म्हणून उपस्थित असलेल्या श्री. आशिष बिजवल, उपविभागीय अधिकारी पुसद यांनी रेशीम उत्पादनाचे महत्त्व अधोरेखित केले.

“रेशीम शेती हा शेतकऱ्यांसाठी उत्तम जोडधंदा आहे. वर्षभरात चार चक्रांमध्ये उत्पादन घेता येते. राज्य व केंद्र शासनाकडून अनुदान व प्रशिक्षणाची सुविधा उपलब्ध आहे. योग्य नियोजनाने हा व्यवसाय मुख्य उत्पन्नाचाही स्रोत होऊ शकतो,” असे ते म्हणाले.

रेशीम विभागातील अधिकारी व अनुभवी उत्पादक शेतकऱ्यांनीही रेशीम शेती व्यवस्थापन, आव्हाने व संधी यावर आपली मते व्यक्त केली.

🍌 केळी पिक क्षेत्राचा विस्तार – गुणवत्तायुक्त उत्पादनावर भर

तालुक्यात संत्र्यानंतर मोठ्या प्रमाणावर केळी लागवडीकडे शेतकऱ्यांचा कल वाढत असल्याचे स्पष्ट झाले.

तज्ज्ञांनी शेतकऱ्यांना मार्गदर्शन करताना –

उती संवर्धित दर्जेदार रोपे,

गादीवाफ्यावर लागवड,

दुहेरी ठिबक सिंचन,

खत व्यवस्थापनाचे महिनावार वेळापत्रक,

घड व्यवस्थापन व विरळणी,

निर्यातक्षम घड निर्मितीसाठी स्कार्फिंग व संजीवकांचा वापर,

तसेच कीड व रोग नियंत्रण

याबाबत सविस्तर माहिती दिली.

कार्यक्रमादरम्यान शेतकऱ्यांनी आपले अनुभव मांडले तर उपस्थित शास्त्रज्ञांनी त्यांच्या प्रश्नांना समर्पक उत्तरे दिली.

👥 मान्यवरांची उपस्थिती

या सुसंवाद कार्यक्रमाला श्री. अक्षय गोस्वामी, उपविभागीय कृषी अधिकारी पुसद, श्री. एस. टी. धनुडे, तालुका कृषी अधिकारी दिग्रस, श्री. हगवणे, रेशीम विभाग, डॉ. विपुल वाघ, शास्त्रज्ञ, केव्हीके दारव्हा, श्री. रामभाऊ मार्केटवर, आत्म समिती माजी अध्यक्ष, श्री. रविंद्र राऊत, संचालक रेशीम गोल्ड FPC, श्री. अरुण ढोरे, रेशीम उत्पादक शेतकरी, श्री. राजेश सवने, केळी उत्पादक शेतकरी आदी मान्यवर उपस्थित होते.

कार्यक्रमाचे सूत्रसंचालन श्री. प्रवीण चलमेलवार यांनी केले तर आभारप्रदर्शन श्री. सागर बोंडे यांनी मानले.

या कार्यक्रमाला संत्रा, केळी उत्पादक शेतकरी तसेच रेशीम शेती करू इच्छिणारे शेतकरी व क्षेत्रीय अधिकारी-कर्मचारी मोठ्या संख्येने उपस्थित राहिल्याने संमेलनाला विशेष महत्त्व प्राप्त झाले.